វ៉ាស៊ីនតោន៖ ជំនួយការរដ្ឋមន្ត្រីការបរទេសទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក លោក Daniel J. Kritenbrink នឹងធ្វើដំណើរទៅកាន់ទីក្រុងភ្នំពេញ ប្រទេសកម្ពុជា និងទីក្រុងតូក្យូ ប្រទេសជប៉ុន ចាប់ពីថ្ងៃទី ១១ ដល់ ១៥ ខែកក្កដា។ នេះបើយោងតាមសេចក្ដីប្រកាសព័ត៌មានរបស់ក្រសួងការបរទេសអាមេរិកថ្ងៃច័ន្ទ ទី១១ ខែកក្កដានេះ។

ក្នុងសេចក្ដីប្រកាសព័ត៌មាននោះឱ្យដឹងថា នៅទីក្រុងភ្នំពេញ លោក Daniel J. Kritenbrink នឹងជួបជាមួយរដ្ឋមន្ត្រីការបរទេសកម្ពុជា លោកឧបនាយករដ្ឋមន្ត្រី ប្រាក់ សុខុន និងមន្ត្រីជាន់ខ្ពស់ផ្សេងទៀតដើម្បីពិភាក្សាអំពីទំនាក់ទំនងទ្វេភាគី ការគាំទ្ររបស់សហរដ្ឋអាមេរិកសម្រាប់កម្ពុជា ក្នុងឋានៈជាប្រធានអាស៊ាន និងបញ្ហាតំបន់ និងពិភពលោក។ លោកក៏នឹងជួបជាមួយយុវជន និងមេដឹកនាំសង្គមស៊ីវិលផងដែរ។

នៅទីក្រុងតូក្យូ លោក Daniel នឹងចូលរួមរំលែកទុក្ខដល់ប្រជាជនជប៉ុន ទាក់ទងនឹងការធ្វើឃាតអតីតនាយករដ្ឋមន្ត្រី អាបេ ស៊ីនហ្សូ។ លោកនឹងជួបប្រជុំជាមួយសមភាគីជប៉ុនជាន់ខ្ពស់ ដើម្បីពិភាក្សា និងជំរុញភាពជាដៃគូដ៏រឹងមាំរវាងសហរដ្ឋអាមេរិក និងជប៉ុនលើបញ្ហាជាច្រើនក្នុងតំបន់ និងពិភពលោក។

ក្នុងសេចក្ដីប្រកាសនោះបន្ថែមថា៖ «សម្ព័ន្ធភាពអាមេរិក-ជប៉ុន គឺជាមូលដ្ឋានគ្រឹះនៃសន្តិភាព និងស្ថិរភាពនៅឥណ្ឌូប៉ាស៊ីហ្វិក ហើយកិច្ចសហប្រតិបត្តិការដ៏ទូលំទូលាយរបស់យើងគឺមិនអាចខ្វះបានក្នុងការប្រឈមមុខនឹងបញ្ហាសកល រួមទាំងសង្រ្គាមដ៏ឃោរឃៅ និងខុសច្បាប់របស់រុស្ស៊ីប្រឆាំងនឹងអ៊ុយក្រែន»។

លោក Daniel J. Kritenbrink បានក្លាយជាជំនួយការរដ្ឋមន្ត្រីការបរទេសទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក នៅថ្ងៃទី២៤ ខែកញ្ញា ឆ្នាំ២០២១។ លោក Kritenbrink គឺជាអ្នកការទូតអាមេរិកតាំងពីឆ្នាំ១៩៩៤មក។

កាលពីខែឧសភាកន្លងទៅលោកមានគម្រោងមកធ្វើទស្សនកិច្ចនៅកម្ពុជាម្ដងហើយដែរ តែត្រូវបានពន្យារពេលវិញដោយសារលោកធ្វើតេស្ត្រឃើញវិជ្ជមានកូវីដ-១៩៕